पुणे: भांडणे झाल्याच्या कारणातून महिलेच्या त्रासाला कंटाळून एका तरुणाने कॅनॉलमध्ये उडी मारून आत्महत्या केली. नयन नरेंद्र मोरे (वय २०, रा. भवानी पेठ) असे त्याचे नाव आहे. त्याचा मृतदेह सोमवारी वैदवाडी कॅनॉल हडपसर येथे आढळून आला.
याबद्दल अधिक माहिती अशी कि, आत्महत्या केलेला तरुण नयन आणि आरोपी महिला जेबा हे शेजारी राहतात. व्हिडिओ काढल्याच्या संशयावरुन जेबा हिने त्याला जाब विचारला व जीवे मारण्याची धमकी दिली. दोन दिवस हा प्रकार सुरू होता. त्यानंतर शनिवारी सकाळी (दि. २३) नयन घरातून निघून गेला. रात्री उशिरापर्यंत तो घरी परत न आल्यामुळे त्याच्या घरच्यांनी समर्थ पोलीस ठाण्यात तो बेपत्ता झाल्याची तक्रार दिली.
दरम्यान, त्याचा हडपसर येथील वैदवाडी कॅनॉल येथे सोमवारी त्याचा मृतदेह मिळून आला. त्याने आत्महत्या केल्याची माहिती मिळाल्यानंतर त्यांच्या नातेवाइकांनी पोलीस ठाण्यात धाव घेत जेबा हिच्याविरुद्ध तक्रार दिली होती. पोलीस उपनिरीक्षक डोंगळे अधिक तपास करीत आहेत.