सातारा: माजी मुख्यमंत्री व काँग्रेस नेते पृथ्वीराज चव्हाण यांना ऐन दिवाळीतच आयकर विभागाकडून नोटीस बजावण्यात आली आहे. याबद्दलची माहिती त्यांनी आज माध्यमांना दिली. या नोटिशीला २१ दिवसांत उत्तर द्यायचं असून प्रत्यक्ष हजर राहण्यासही सांगण्यात आलं आहे. त्यादृष्टीने आम्ही योग्य ती कार्यवाही करत आहोत, असं चव्हाण यांनी स्पष्ट केलं. ही नोटीस म्हणजे आयकर विभागाच्या नियमित प्रक्रियेचा भाग आहे. या नोटिशीला सविस्तर उत्तर देण्यात येईल, असं चव्हाण पुढे म्हणाले.
यावेळी त्यांनी भाजपच्या कार्यपद्धतीवर टीका करत यंत्रणांच्या गैरवापरावर अप्रत्यक्षपणे बोट ठेवलं. 'सत्तेचा वापर कसा करायचा, तो कोणासाठी करायचा, याबद्दल भाजपनं नियोजनबद्धपणे व्यूहरचना केली आहे. त्यानुसार सगळं काही सुरू असतं. काही दिवसांपूर्वी शरद पवार यांना अशीच नोटीस आली होती आणि आता मला नोटीस पाठवण्यात आली आहे,' असं चव्हाण यांनी म्हटलं. सत्तेचा वापर कसा करायचा हे भाजपला चांगलं माहीत आहे, असं उत्तर चव्हाण यांनी दिलं. भाजपच्या नेत्यांना आयकर विभाग नोटिसा पाठवत नाही, याकडेही त्यांनी लक्ष वेधलं.
Join Free WhatasApp माणदेश एक्सप्रेस न्युज