बंगळूर : हुबळी विद्युत पुरवठा कंपनीच्या अखत्यारीत येणाऱ्या शेतकऱ्यांना दररोज तीन टप्प्यांत सहा तास वीज पुरवठा देणार आहे. हेस्कॉमच्या या निर्णयामुळे दुष्काळी जिल्ह्यांतील शेतकऱ्यांमध्ये समाधानाचे वातावरण आहे.
दुष्काळी परिस्थितीमुळे वीज उत्पादनासाठी पुरेसे पाणी नाही. पवन, सौर आणि औष्णिक वीज उत्पादनावरही परिणाम झाला आहे. मुख्यमंत्री सिद्धरामय्या आणि ऊर्जा मंत्री के. जे. जॉर्ज यांच्या निर्देशानंतर हेस्कॉमने शेतकऱ्यांना सहा तास पूर्ण दाबाने वीजपुरवठा करण्याचा निर्णय घेतला आहे.
आतापर्यंत केवळ चार तास तीन टप्प्यांत वीजपुरवठा केला जात होता. हेस्कॉमने धारवाड, बेळगाव, विजापूर, बागलकोट, गदग, हावेरी आणि कारवार जिल्ह्यांतील शेतकऱ्यांना पाच ते सहा तास वीजपुरवठा करण्याचा निर्णय घेतला आहे.
ज्या शेतकऱ्यांची ऊस, भात आणि बागायती पिके जवळजवळ काढणीसाठी तयार होती, त्यांना वाढीच्या या टप्प्यावर पाण्याची नितांत गरज होती. मात्र, वीजपुरवठा खंडित झाल्याने त्यांच्यावर परिणाम झाला आहे. त्यामुळे अनेक शेतकऱ्यांनी धारवाड, विजापूर आणि इतर जिल्ह्यांतील हेस्कॉम कार्यालयांत निदर्शने केली आणि आठ तास थ्री-फेज वीज पुरवठ्याची मागणी केली होती.
ऊस तोडणीसाठी तयार असल्याने त्यांना सिंचनासाठी अधिक वीज पुरवठ्याची गरज भासणार नाही आणि वापर कमी होईल. साखर कारखाने सुरू झाल्यानंतर तेही वीज निर्मिती करतील आणि त्यामुळे वीजपुरवठा सुरळीत होण्यास मदत होईल.
